तीन हजार भन्दा बढी किशोरीलाई एचपिभी खोप लगाइँदै हुम्लामा

माघ २६,२०८१
हुम्ला । हुम्लामा पाठेघरको मुखको क्यान्सर विरुद्धको एचपीभी खोप आइपुगेको छ। आउँदो फागनु १८ गतेबाट सुरु हुने एचपीभी खोप यहाँ आइपुगेको हो । जनस्वास्थ्य सेवा कार्यालय हुम्लाका अनुसार १० देखि १४ वर्ष उमेर समूहकाका लागि ३ हजार ७ सय ८० भाइल खोप आइपुगेको छ। पर्याप्त खोपको मात्रा आइपुगेकाले मापदण्ड भित्रका कुनै पनि किशोरीहरू खोप लगाउनबाट वञ्चित नहुने जिल्ला जनस्वास्थ्य कार्यालय हुम्लाका प्रमुख प्रतिक्षा भारतीले बताइन् ।
हिमाली जिल्ला हुम्लामा केही ढिलो गरी शुरु हुने एचपीभी खोपको ६वटा गाउँपालिकामा शुरु हुनेछ भने नाम्खा गाउँपालिकामा अहिले समय पछि खोप संचालन गरिने भएको छ ।
पाठेघरको मुखको क्यान्सर विरुद्ध प्रयोग हुने ह्युमन प्यापीलोमा भाइरस (एचपीभी) खोपका लागि उक्त खोप हुम्लामा आइपुगेको हो । हिमाली जिल्ला हुम्लामा अहिले विद्यालयहरु बन्द भएकै कारण फागुन १८ गतेबाट शुरु गर्ने भएको हो । यो जिल्लामा फागुन २ गते विद्यालय सञ्चालन हुने भएका छन् । स्वास्थ्य सेवा कार्यालय हुम्लाका प्रमुख भारतीका अनुसार, जिल्लाका ७ वटा स्थानीय तहमा ९९ वटा खोप केन्द्रबाट उक्त खोप अभियान सञ्चालन हुने भएको बताउनुभयो ।
देशभर माघ २२ गतेदखि फागुन ६ गतेसम्म यो खोप अभियान सञ्चालन हुने भएपनि हुम्लामा भने फागुन १८ गतेदेखि केही ढिला गरी खोप अभियान सञ्चालन हुने भएको प्रमुख भारतीले बताइन् । जिल्लामा चिसो मौसमका साथै दुर्गम जिल्लाको विभित समस्यालाई हेरी केही समय ढिला गरी यो खोप अभिययान सञ्चालन हुने भएको हो ।
जिल्लाको ६ वटा स्थानीय तहमा फागुन २९ गतेसम्म र नाम्खा गाउँपालिकाको हिमाल पारीको गाउँ लिमी, यारी लगायतका गाउँ हिउँले बाटो बन्द भएकोले फागुन महिनाको २० गते देखि २०८२ सालको बैशाख ७ गतेसम्म खोप अभियान सञ्चालन गर्नेे प्रमुख भारतीले बताउनुभयो ।
जिल्लाको उत्तरी नाम्खा गाउँपालिकाको १७ खोप केन्द्रबाट ३ सय १९ किशोरी, सिमकोटमा २० खोप केन्द्रबाट ७ सय ५६, खार्पुनाथमा १५ खोप केन्द्रबाट ३ सय ६५, सर्केगाडमा १८ खोप केन्द्रबाट ६ सय ८६, चंखेलीमा ७ खोपबाट ३ सय ३१, अदानचुलीमा १० खोप केन्द्रबाट ६ सय ७ र ताँजकोटमा १२ खोप केन्द्रबाट ३ सय ७८ जना किरोशीलाई पाठेघरको मुखको क्यान्सरविरुद्धको एचपिभी (ह्युमन प्यापिलोमा भाइरस) खोप लगाइने भएको स्वास्थ्य सेवा कार्यालय हुम्लाले जनाएको छ ।
विद्यालय जाने कक्षा ६ देखि १० सम्मका किशोरीलाई विद्यालयमै खोप दिइने र विद्यालय नजाने किशोरीलाई पनि उक्त खोप लगाइने तयारी गरिएको छ । खोप केन्द्रमा ९९ जना स्वास्थ्यकर्मी र १ सय ९८ जना स्वयंसेवक परिचालन गरिने भएको छ । जिल्लाका सबै स्थानीय तहहरूसँग समन्वय गरी कार्यक्रम सञ्चालन गरिनेछ निकट भविष्यमा महिलाको पाठेघरको मुखमा हुन सक्ने क्यान्सरको जोखिमलाई मध्यनजर गर्दै एचपीभी खोप अभियान सुरु हुन लागेको स्वास्थ्यकर्मी बताउँछन्।

 

एक वर्षमा ३६ करोड ४७ लाख सामाजिक सुरक्षा भत्ता वितरण

माघ २६,२०८१
हुम्ला । हिमाली जिल्ला हुम्लामा सामाजिक सुरक्षा कार्याक्रम अन्तर्गत एक आर्थिक वर्षमा करिब रु ३६ करोड ४७ लाखा रकम वितरण गरेको छ ।
गत आर्थिक वर्ष २०८०÷०८१ मा यस कार्यक्रमअन्तर्गत रु ३६ करोड ११ लाख १५ हजार ४० रुर्पौया रकम मसान्त सम्म निकासा भएको जनाएको छ । कोष तथा नियन्त्रक कार्यालयका अनुसार ३६ करोड ४७ लाख ५९ हजार ३१ रुपैँया सातै वटा गाउँपालिकामा खर्च भएको जनाएको छ ।
त्यसैगरी हुम्लाका सातवटै गाउँपालिकमा जेष्ठनागरिक,एकल महिला,बालबालिकामा, अपाङ्गता भत्ता वितरण प्रवाधन रहेको बताएको छ । यसअघिका वर्षमा सेवाग्राहीलाई घरघरै रकम पु¥याइने गरिए पनि अब सबैलाई अनिवार्य बैंक खातामा रकम पठाउने व्यवस्था गरिएको कार्यालयले जनाएको छ । कतिपय यता सेवाग्राही वृद्धवृद्धाले भने अहिले सम्म बैंकले समयमा सुरक्षा भत्ता नदिएको गुनासो गरेका छन् । सेवाग्राहीलाई रकम प्राप्त गर्न सजिलो बनाउन लागि सम्बन्धित बैंकहरुलाई सेवा प्रवाहको लागि सहज बनाउन आग्रह गरिेको छ ।
सामाजिक सुरक्षा भत्ता वितरण कार्यक्रम स्थानीय सरकार स्थापन भईसकेपछिको स्थानीय तहमै बैक स्थापान पछिको पहिलो सामाजिक सुरक्षा भत्ता वितरण कार्याक्रम सफल भएको छ ।  सुरक्षा भत्ता वितरण कार्याक्रममा पछिल्लो समय अशक्त, अपाङ्ग र जेष्ठ नागरिकको जीवन निर्वाह गर्नेको लागि सहज भएको छ । पटक पटक सरकारले सामाजिक सुरक्षा कार्याक्रम बढाउँदै गरेको पनि देखिन्छ ।
नेपाल सरकारले सामाजिक सुरक्षा भत्ता कार्यक्रमले असक्त, अपाङ्ग, एकल महिला तथा जेष्ठ नागरिक सहित लोपोन्मुख जातजाति, दलित तथा साविक कर्णाली लगायतका दुर्गम जिल्लाका ६० वर्षमा नागरिकहरु र पाँच बर्षमुनिका बाललालिकाहरु लाई लागुगरिएको छ । २०५१ सालमा नेकपा एमाले नेतृत्वको सरकारको पालामा प्रधानमन्त्री मनमोहन अधिकारीले सुरु गरेको वृद्धभत्ता कार्यक्रमलाई अहिले लोकप्रिय बन्दै आएको छ ।

 

अध्यक्ष प्रचण्डद्वारा पार्टी प्रवेश गर्नेहरुलाई स्वागत

माघ २५,२०८१
काभ्रे । नेकपा ९माओवादी केन्द्र का अध्यक्ष पुष्पकमल दाहाल ‘प्रचण्ड’ले आज काभ्रेपलाञ्चोक जिल्लाका विभिन्न स्थानबाट विभिन्न पार्टी परित्याग गरी माओवादी केन्द्रमा प्रवेश गर्नेहरुलाई स्वागत गर्नुभएको छ ।
माओवादी केन्द्र जिल्ला समन्वय समिति काभ्रेपलान्चोकको आयोजना धुलिखेलमा भएको राजनीतिक वैचारिक प्रशिक्षणका क्रममा उहाँले नवप्रवेशीहरुलाई स्वागत गर्नुभएको हो ।
तेमाल गाउँपालिकाबाट रावणजी तामाङको नेतृत्वमा २१ जना, धुलिखेल नगरपालिकाबाट भीमबहादुर मोक्तान, वीरबहादुर घिसिङसहित २५ जना, बेथानचोकबाट बद्रिप्रसाद तिमिल्सिनासहित १० जना, र रोशी गाउँपालिकाबाट जोवान लामासहित विभिन्न व्यक्तिहरु माओवादी केन्द्रमा प्रवेश गरेका हुन् । उनीहरु कांग्रेस, एमाले लगायतका दलहरु परित्याग गरी माओवादी केन्द्रमा प्रवेश गरेका हुन् ।
धुलिखेल नगरपालिकाको हलमा राजनीतिक वैचारिक प्रशिक्षण जारी छ । प्रशिक्षणमा अध्यक्ष प्रचण्ड, उपाध्यक्ष अग्निप्रसाद सापकोटा, केन्द्रीय सदस्य सूर्यमान दोङलगायतका नेताहरुको सहभागिता रहेको छ ।

सुधारवाद र उदारवाद होइन, बामपंथ र क्रान्तिकारी लाइन पकड्ने सङ्कल्प गरेका छौंः प्रचण्ड

माघ २५,२०८१
काभ्रे। नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले समाजवादी क्रान्तिको सङ्कल्प गर्ने बेला आएको बताउनुभएको छ । माओवादी केन्द्र जिल्ला समन्वय समिति काभ्रेपलान्चोकको आयोजना धुलिखेलमा भएको राजनीतिक वैचारिक प्रशिक्षणलाई सम्बोधन गर्दै उहाँले यस्तो धारणा राख्नुभएको हो ।
उहाँले अहिले देशभरि भइरहेका भेला र प्रशिक्षणहरुलाई समाजवादी क्रान्तिकै तयारीको रुपमा बुझ्न पनि कार्यकर्ताहरुलाई आग्रह गर्नुभयो । ‘हामीले जनयुद्धको तयारी गर्दा पनि यसरी नै देशभरि भेला र प्रशिक्षण गरेका थियौं’– उहाँले भन्नुभयो– ‘अहिले हामी समाजवादी क्रान्तिको तयारीको चरणमा फेरि त्यस्तै कार्यक्रमहरु गरिरहेका छौं, यो हामीले समाजवादी क्रान्तिको संकल्प गर्ने बेला हो ।’
जनयुद्ध गर्नुअघि माओवादी शक्तिलाई बिरोधीले अपत्याएको स्मरण गर्दै अध्यक्ष प्रचण्डले स्पष्ट विचार, सिद्धान्त र कार्यक्रमका आधारमा जनयुद्ध अघि बढाएकाले देशकै प्रमुख शक्तिको रुपमा स्थापित हुन सफल भएको बताउनुभयो । ‘पछिल्लो शान्तिकालमा हामी कतै लरबरायौं, अलिकति सुधारवाद र उदारवादमा हरायौं, जसले गर्दा हाम्रो आफ्नै वर्गले पनि क्रान्तिका बाँकी सपना अधुरै रहन हुने कि भन्ने आशंका गर्न थाल्यो’– उहाँले भन्नुभयो– ‘तर, अहिले हामीले गम्भीर आत्मसमीक्षा गरेका छौं, भर्खरैको केन्द्रीय समिति बैठकपछि हामीले सुधारवाद र उदारवाद होइन, बामपंथ र क्रान्तिकारी लाइन दह्रोसँग पकड्ने सङ्कल्प गरेका छौं, यही नै हाम्रो समाजवादी क्रान्तिप्रतिको सङ्कल्प हो ।’
शान्ति सम्झौता गरेर पार्टी बहुदलीय प्रतिष्पर्धामा आएपछि दायाँ र बायाँ गर्दै अघि बढ्ने क्रममा माथिदेखि तलसम्म नेता कार्यकर्ताहरु बढी नै दायाँतिर ढल्कन थालेको यथार्थ बोध गरेर नै अब पार्टीलाई बायाँतिर अघि बढाउने नीति र कार्यक्रम अघि सारिएको उहाँले स्पष्ट गर्नुभयो । जनयुद्धको उत्कर्ष चरणमा भएको चुनबाङ बैठकको निर्णय स्मरण गराउँदै अध्यक्ष प्रचण्डले भन्नुभयो– ‘हामीले त्यतिबेला स्पष्ट भनेका थियौं– अब गणतन्त्र आउँछ, यसका लागि बुर्जुवाहरुसँग सम्झौता गर्नुपर्ने पनि हुनसक्छ तर त्यो गणतन्त्रलाई बर्जुवाहरुले आफ्नोअनुकूलको गणतन्त्र बनाउने प्रयास गर्ने छन् र हामीले समाजवादी गणतन्त्र बनाउने प्रयास गर्ने छौं । अहिले हामी यही संघर्षको विन्दुमा आइपुगेका छौं ।’
शान्ति प्रक्रिया र संविधान लेखनहुँदै यहाँसम्म आइपुग्दा विभिन्न सफलता र कमजोरीका बीच एउटा कालखण्ड पार गरिएको उल्लेख गर्दै उहाँले अब पार्टी सम्पूर्ण रुपमा समाजवादी क्रान्तिको चरणमा अघि बढ्ने बताउनुभयो । जनयुद्धको थालनी, जनयुद्ध सञ्चालन, शान्ति सम्झौता, संविधानसभाको निर्वाचन, गणतन्त्र घोषणा जस्ता युगान्तकारी निर्णय गर्ने अवसर पाउने माओवादी मात्रै एक मात्र शक्ति भएको उल्लेख गर्दै अध्यक्ष प्रचण्डले समाजवादी क्रान्तिको थालनी पनि माओवादीले नै गर्ने बताउनुभयो । यद्यपि यसका लागि माओवादी नेता कार्यकर्ताहरुको रुपान्तरणको विकल्प नभएको उहाँले स्पष्ट गर्नुभयो ।
‘अब भाषण गरेर प्रशिक्षण दिएर मात्रै रुपान्तरण संभव हुने देखिएन’– उहाँले भन्नुभयो– ‘त्यसैले यो काम अब नेतृत्वबाट नै सुरु गर्नुपर्छ भनेर म पूरै आत्मसमीक्षा सहित देशभरि नेता कार्यकर्ता र जनताको बीचमा पुग्ने अभियानको थालनी गरेको छु । मैले एक चरण यो अभियान पूरा गरेपछि अब लगत्तै सिंगो पार्टी एकैसाथ देशभरि परिचालित हुने छ, रुपान्तरणको नयाँ अभियान अघि बढ्ने छ ।’


समाजवादी क्रान्तिकै लक्ष्यसहित आफूले तेस्रोपटक सरकारको नेतृत्व गर्दा सुशासन, सामाजिक न्याय र समृद्धिको मूल बाटो तय गर्दै भ्रष्टाचारविरुद्धको महाअभियान सुरु गरेको उहाँले स्पष्ट गर्नुभयो । ‘म आज तपाईहरुलाई आत्मविश्वासका साथ भन्न सक्ने अवस्थामा उभिएको छु, हामीले सुरु गरेको सुशासन, सामाजिक न्याय र समृद्धिको अभियान नै समाजवाद निर्माणको भ्रुण थियो’– अध्यक्ष प्रचण्डले भन्नुभयो– ‘हामीलाई कांग्रेस एमालेभन्दा फरक हो भनेर जनताले सजिलो गरी बुझ्ने अभियान पनि यही हो र पार्टीको अबको बाटो पनि यही हो ।’
यही सङ्कल्प नै अहिले जनतामा आशाको दियो बाल्ने, पार्टी पुनर्निर्माण गर्ने र नेता कार्यकर्ताहरुमा रुपान्तरणको आत्मविश्वास बढाउने प्रारम्भिक विन्दुको रुपमा स्थापित हुन पुगेको उहाँले बताउनुभयो । ‘हामी प्रतिष्पर्धाकै बाटोबाट समाजवादी क्रान्तिको नेता पार्टी माओवादीलाई बनाउँछौं, तपाईहरु हरेक क्षेत्रमा देखिने बेथिति र भ्रष्टाचारका विरुद्ध दृढतापूर्वक उभिनुस्’– कार्यकर्ताहरुलाई सम्बोधन गर्दै अध्यक्ष प्रचण्डले भन्नुभयो– ‘हामी सबै नेता कार्यकर्ताहरु रुपान्तरण भएर जनताको बीचमा जाऔं, फेरि पनि जनताको एकताको तागतको बलमा हामी विजयी हुन्छौं ।’ दलाल र बिचौलियाहरुको घेरामा परेपछि क्रान्तिकारी नैतिकता हराउने उल्लेख गर्दै उहाँले क्रान्तिको एक मात्र शर्त इमान र जनताप्रतिको समर्पणभाव भएकाले यसमा कुनै पनि तहका नेता कार्यकर्ताहरुले दायाँबायाँ गर्न नहुने बताउनुभयो ।

प्रचण्डको सम्बोधन:सरकारविरुद्ध आक्रोश,साना दललाई सान्त्वना

माघ २४,२०८१
काठमाडौं । प्रमुख प्रतिपक्ष दल नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले संसदमा सम्बोधन गर्नुभयो ।
उनले सम्बोधनमा विशेष गरी कांग्रेस, एमाले र सरकारविरुद्ध आक्रोश पोख्र्नुभयो । प्रचण्डले सरकारका कार्यशैली प्रति प्रधानमन्त्री केपी शर्मा ओलीको चर्को आलोचना गर्नभयो । उनले संविधान संशोधनका विषयमा जथाभावि नबोल्न समेत सचेत गराए । यो सरकार माफिया र विचौलियाले बनाएको भन्दै प्रचण्डले चर्को कटाक्ष गरे ।
बिहीबार संसद्लाई सम्बोधन गर्दै प्रचण्डले सहकारी अपचलनमा सिधै संलग्न नभए पनि कम्पनीमा सहकारीको रकम आएकै कारण रवि लामिछानेलाई हिरासतमा राखिएको तर कर छली र ललिता निवास प्रकरणबाट आएको पैसाले आफनै पार्टीको केन्द्रीय कार्यालय बनाएको आरोप लगाए । सत्ता गठबन्धनले संविधान संशोधन गरी थ्रेस होल्ड बढाएर आफ्नो अस्तित्व समाप्त पार्ने हो कि भन्ने चिन्ता बढिरहेको समयमा प्रचण्डले ती साना दललाई सान्त्वना दिएका छन् ।

सुत्केरी महिलाको हेलिकप्टरबाट उद्धार

माघ २४,२०८१
हुम्ला । हुम्लाको अदानचुली गाउँपालिकामा सुत्केरी व्यथा लागेकी एक महिलाको आज हेलिकप्टरबाट उद्धार गरेर थप उपचारका लागि सुर्खेत लगिएको छ ।
अदानचुली गाउँपालिका –२ महत गाउँकी ३१ वर्षीया असली महतारा लाई सुत्केरी व्यथा लागेर  थप उपचारका लागि सुर्खेत लगिएको हो ।
महताराकोे स्थानीय स्वास्थ्य चौकीमा उपचार गर्दा पनि सुत्केरी हुन नसकेपछि थप उपचारका लागि हेलिकप्टरमार्फत सुर्खेत लगिएको श्रीनगर स्वास्थ्य चौंकीका अहेव अशोक महताराले बताउनुभयो । “स्थानीय स्वास्थ्य चौकीमा उपचार हुन नसकेपछि थप उपचारका लागि सुर्खेत लगिएको हो”, उहाँले भन्नुभयो, “महतरालाई माघ २३ गते विहाना ५ बजेतिर सुत्केरी व्यथा लागेको दुई दिनसम्म पनि सुत्केरी हुन नसकेका कारणले सुर्खेतमा रिफर गरिएको हो ।”

राष्ट्रपति महिला उत्थान कार्यक्रमअन्तर्गत दुर्गम क्षेत्रका ज्यान जोखिममा परेका गर्भवती तथा सुत्केरीको निःशुल्क हवाई उद्धार गरिएको हुम्लाका प्रमुख जिल्ला अधिकारी नारायण पाण्डेले बताउनुभयो । ‘दुर्गम क्षेत्रका ज्यान जोखिममा परेका गर्भवती तथा सुत्केरीका लागि हवाई उद्धार कार्यविधि’ अनुसार हवाई उद्धार भइरहेको छ ।
कार्यविधिमा धेरै दिन प्रसव व्यथा लागेको, बच्चा जन्माउन कठिनाइ भएको, गर्भमै बच्चाको मुत्यु भएको, गर्भवती अवस्थामा अत्यधिक शरीर सुन्निएको, सुत्केरीपश्चात् अत्यधिक रक्तस्राव भएको, रक्तअल्पता भएको, स्थानीय स्वास्थ्य संस्थाबाट उपचार हुन नसकेका सुत्केरी तथा गर्भवतीलाई हवाई उद्धार गर्ने गरिएको प्रमुख जिल्ला अधिकारी पाण्डेले जानकारी दिनुभयो ।

प्रेस चौतारी हुम्लाको अध्यक्षमा बोहरा

माघ २४,२०८१
हुम्ला । प्रेस चौतारी नेपाल जिल्ला शाखा हुम्लाको छैटौँ जिल्ला अधिवेशन सम्पन्न भएको छ । विहीबार सदरमुकाम सिमकोटमा सम्पन्न अधिवेशनले प्रेस चौतारी हुम्ला शाखाको नयाँ कार्यसमिति सर्वसम्मत रुपमा निर्वाचित गरेको हो ।
अधिवेशनले आगामी तीनवर्षे कार्यकालका लागि रास्ट्रिय समाचार समितिका हुम्ला जिल्ला संवाददाता तथा रेडियो कर्णाली आवजका समाचार प्रस्तोता दान बोहराको अध्यक्षतामा नयाँ कार्यसमिति सर्वसम्मत रुपमा निर्वाचित गरेको छ । अधिवेशनको निर्वाचनबाट हुम्ला शाखाको उपाध्यक्षमा रतन रावत,महिला उपाध्यक्षमा बेलुमाया महतारा, सचिवमा मोहनसिंह बुढा, कोषाध्यक्षमा ऐटन रावल र सह सचिवमा लक्ष कामी सर्वसम्मत निर्वाचित भएका छन् । यसैगरी शाखाको कार्यसमिति सदस्यहरुमा धनबहादुर भण्डारी, र भाग्गी थापा निर्वाचित भएका छन् ।
प्रदेश प्रतिनिधि परिषद सदस्यमा सुरेश परियार,नृपराज हमाल,पदमराज हमाल चयन भएका छन भने र केन्द्रीय प्रतिनिधि परिषद सदस्यमा कालीबहादुर थापा र नन्द सिंह निर्वाचित भएका छन् । प्रेस चौतारी अहिले देशव्यापी रुपमा जिल्ला अधिवेशनमा होमिएकाले सोही अनुसार हुम्लाको पनि अधिवेशन सम्पन्न गरिएको प्रेस चौतारी नेपालका केन्द्रीय सदस्य रमेश ऐडीले जानकारी दिए ।

                                                                                        पत्रकारिता पुरस्कार सञ्चारकर्मी रावतलाइ
प्रेस चौतारी नेपाल हुम्ला शाखाले संचालन गरेको यस वर्षको पत्रकारिता पुरस्कार सञ्चारकर्मी राजन रावत लाई पुरस्कृत गरेको छ ।
पुरस्कृत हुने रावत नेपाल पत्रकार महासंघ हुम्ला शाखाको अध्यक्ष समेत रहेका छन् । बिगत लामो समयदेखि जिल्लामा पत्रकारिता गर्दे आएका हुम्ला जिल्ला सिमकोट गाउँपालिका– ५ निवासी रावत प्रेस चौतारीले जिल्लामा कृयाशिल पत्रकारहरुलाई प्रदान गर्दै आएको पत्रकारिता पुरस्कारबाट पुरस्कृत भएको प्रेश चौतारी हुम्लाका नवनिर्वाचित अध्यक्ष दाने बोहराले बताए ।
पुरस्कृत रावतलाई नगद पुरस्कार, प्रमाणपत्र नेकपा एमाले हुम्लाका सचिव तीर्थराज बोहराले प्रदन गरेका थिए भने प्रेश चौतारीका केन्द्रीय सदस्य रमेश ऐडीले अविर खादा लगाउने कार्य गरेका थिए । प्रेश चौतारीको छैटौं जिल्ला अधिबेशनको उद्घाटन सत्रमा उक्त पुरस्कार प्रदान गरिएको हो ।
पुरस्कृत भएपछि रावतले जिल्लामा थप क्रियाशील भएर पत्रकारिता गर्ने प्रतिबद्धता ब्यक्त गरे । त्यसैगरि प्रेश चौतारी नेपालले पत्रकार बेलुमाया महतारालाई सम्मान गरेको छ । महतारातालाई दोसल्ला ओढाएर सम्मान गरिएको थियो । महतारा प्रेश चौतारीमा आबद्ध रहँदै आएकी छन भने उनीले रेडियो कर्णाली आवज समाचार प्रस्तोता हुन् ।

 

प्रेस चौतारी नेपाल हुम्लाले मनायो स्थापना दिवस

माघ २२ ,२०८१
हुम्ला। प्रेस चौतारी नेपाल हुम्लाले चौतारीको २७ औँ स्थापना दिवस विशेष कार्यक्रमका साथ मनाएको छ । प्रेस चौतारी नेपाल हुम्लाले आयोजना गरेको कार्यक्रम संगठनका जिल्ला अध्यक्ष नन्द सिहंको अध्यक्षता तथा नेकपा एमाले जिल्ला पार्टी हुम्लाका उपध्यक्ष प्रकाश बहादुर शाहीको प्रमख आतिथ्ययतामा भएको हो ।
कार्यक्रममा प्रेस चौतारी नेपालका केन्द्रीय सदस्य रमेश ऐडी,एमाले जिल्ला सह सचिव प्रताब लामा, प्रेस सेन्टर नेपालका केन्द्रीय सचिव अर्जुन बोहरा,नेपाल पत्रकार महासंघ हुम्लाका अध्यक्ष राजन रावत, प्रेस युनियनका जिल्ला उपध्यक्ष छपाल लामा र प्रेस सेन्टरका जिल्ला अध्यक्ष तिलसरा विकको लगायतले स्थापना दिवसको अवसरमा शुभकामना प्रदान गर्नुभएको थियो ।


कार्यक्रमका सहभागीलाई संगठनकी जिल्ला उपाध्यक्ष बेलुमाया महतराले स्वागत गर्नुभएको थियो । कार्यक्रममा प्रेस चौतारी नेपाल हुम्लाको लामो समय देखि संगठनको बारेमा खेलेको भुमिका प्रति सम्मान गर्दे केन्द्रीय सदस्य रमेश ऐडी र पूर्व संगठनका अध्यक्ष मिमसिह नेपाली लाई सम्मानित गरिएको थियो । एमाले जिल्ला पार्टीका उपध्यक्ष प्रकाश बहादुर शाहीले उहाँलाई सम्मानित गर्नुभएको हो ।


स्थापना दिवसका अवसरमा विभिन्न जिल्ला र शाखाहरुमा पनि कार्यक्रम संचलन गरेर मनाएका छन् । ०५५ मंसिरमा आयोजित भेलाले गठन गरेको तदर्थ समितिले ०५५ माघ २२ गते विजय चालिसेको नेतृत्वमा प्रेस चौतारी नेपाल दर्ता गरेको थियो । सोही दिनको स्मरणमा प्रेस चौतारीले माघ २७ गते स्थापना दिवस मनाउँदै आएको छ ।

 

हुम्लाको ठेहे गाउँमा खसक्षेत्रीको अनौठो संस्कृति बाक्पा नाच लोपन्मुख

अग्नीपीडित लाई न्यानो कपडा वितरण

माघ २१, २०८१
हुम्ला । सत्य साई सेवा संगठन नेपालले आर्थिक सहयोग र सत्य साई केन्द्र हुम्लाको आयोजन हुम्ला जिल्ला सिमकोट गाउँपालिका वडानं ८का अग्नीपीडित लाई न्यानो कपडा वितरण गरेको छ ।
उक्त संस्थाले विपदमा परेका समुदायलाई सहयोग र मानवताको सन्देश दिनको लागि दुर्गम गाउँमा वितरण गरेको जनाएको छ । सिमकोट गाउँपालिकाका वडानं ८ याङ्गु गाउँका आगलागी परिवारलाई जाडो छल्नको लागि फाइरबर सिरक बितरण गरिएको हो ।


सिमकोट गाउँपालिका वडानं १मा ६,वडानं २मा २,वडानं ४मा १,वडानं ५मा १ र वडानं ८मा ७ घरपरिवार लाई जम्मा १७ थान फाइवर सिरक वितरण गरेको स्थानीय समाजसेवी युवा नेता कुशुम शाहीले बताईन् । उक्त सहयोगले उनीहरूको जीवनमा केही सहजता ल्याउने र चिसो बढ्दै गर्दा कसरी चिसोबाट बच्न मद्दत पुग्ने बताइएको छ ।
नेपाली काँग्रेस जिल्ला कार्यसमितिका उपसभापति तथा सत्य साई केन्द्र हुम्लाका संयोजक वसन्त रोकायाको विशेष पहलमा सिमकोट गाउँपालिका वडा नं ८ याङ्गु गाउँका आगलागी पिडित र अन्य वडामा रहेको विपन्न परिवारलाई न्यानो ( फाइबर) सिरक बितरण गरेको छ